Таниқли публицист Аҳмаджон Мелибоевнинг ушбу кундалик китоби ишқий қисса, саргузашт роман ёки бадиий-фалсафий эссе эмас, унда детектив асарга хос кутилмаган воқеа-ҳодисалар талқини, бадиий ифода, ижодий тўқималар йўқ. Муаллиф дунёни бир ҳамла билан ларзага келтирган, ер юзида тирикликни шубҳа остига олган, инсон онг-шуури, турмуш тарзи ва ўй-хаёлларини остин-устун қилиб юборган коронавирус пандемиясининг юзага келиши, дунё бўйлаб ёйилиши ҳақида мушоҳада юритади. У билан танишган ҳар бир киши олдида бу кулфат тасодифми ёки унинг синов янглиғ асослари борми, ҳаётни ҳаёт мақомида, Инсонни Инсон мақомида тутиб туриш учун нималар қилиш кераклиги тўғрисидаги ғоят мураккаб саволлар кўндаланг бўлади. Уларга жавоб топмас эканмиз, бамайлихотир яшашимиз мумкин эмас.