Har bir ishning amalga oshish o‘z vaqti-soati bo‘lishini, odam zoti qanchalik istasin-istamasin Buyuradigan buyurgan kunida yuzaga chiqishining necha martalab guvohi bo‘lganmiz. Hazrat Alisher Navoiyning qo‘lingizdagi uch muhtasham asari-"Tarixi anbiyo va hukamo", "Tarixi muluki ajam", "Munojot" tarjima qilinmadi, ya'ni bir tildan boshqa tilga ag‘darilmadi. Qo‘lingizdagi javohir buyuk shoir va millat faxri Alisher Navoiyning 580 yillik to‘yiga munosib sovg‘a bo‘lishiga hamda Yurtboshimiz ta'kidlaganlaridek, ulug‘ bobomizning ko‘nglini xalqimizga yanada yaqinlashtirishga, bu qadrli merosni ma'naviyatimizning hayotbaxsh manbayi va tarkibiy qismiga aylantirishga xizmat qiladi degan umiddamiz.